Mat 18 | MED | STEP | Ei kᵾn, kitip kᵾni wu ni kᵾⱡ ndi ok, Jisas waldᵾk nᵾk mel, “Got nga wamp tᵾpa mumuk rui uⱡ ila wamp nam ti, nuim moⱡmba?” nᵾtᵾng.

Matthew 18

Tᵾpa Mumuk Rui Kona Ila Wamp Nam Ti Nuim Moⱡmba?

1 Ei kᵾn, kitip kᵾni wu ni kᵾⱡ ndi ok, Jisas waldᵾk nᵾk mel, “Got nga wamp tᵾpa mumuk rui uⱡ ila wamp nam ti, nuim moⱡmba?” nᵾtᵾng.

2 Wote Jisas ndi, kangambuⱡa ti, wi ropa tᵾpa rᵾk ting ila mondpa nimba mel, “Enim ik kupa ei, kundᵾp nᵾnt, enim nga numan ei, ropᵾl rok, kangambuⱡa mel rᵾⱡi naⱡᵾng ndam, enim Got nga wamp tᵾpa mumuk rui uⱡ ila rukᵾr puk, muⱡing mel kapⱡa mon. 4 Wamp ti ndi, ya kangambuⱡa kel ei mel raⱡpa, elim nga orunga mepa mana omba moⱡum ndam, Got nga wamp tᵾpa mumuk rui uⱡ ila nuim moⱡmba.

5 “Wamp nam ti ndi, na nga mbi ila wamp ti, ya kangambuⱡa ei mel, rawe etpa rukᵾr tᵾm ndam, ei na kᵾn etmba.

Uⱡ Kit Mat Ndi, Wamp Nga Mondpa Pili Etpa Kit Mondrum

6 “Wote, wamp ti ndi, na mondᵾk pilip moⱡum ndam, wamp kel mbᵾ nga ti ndi, kunt kan itangga, uⱡ kit em ndam, kunt kan em wamp ei nga nuim kan ila, ku ou ti tᵾk romᵾndᵾk, mek puk, nu moimbᵾⱡ tila rok mana ndangina, nu wanggᵾⱡ nga ndam pᵾp. 7 Enim ya mᵾi kona ila, kunt kan etmin wamp mat ndi itangina, mondpa pili wamp mat uⱡ kit eng ndam, kunt kan wamp mbᵾ nga kont enim! Kunt kan uⱡ ei, pepa mint mba. Ei wote, wamp kᵾn kunt kan puⱡ pendpa etᵾm wamp ei nga kont enim. 8 Nim nga kᵾmp muna, ki ei ndi itangga, nim uⱡ kit in ndam, uⱡ kit em mel ei, koⱡmung etᵾk mundᵾk kili! Nim ki tenda kep, kᵾmp tenda muⱡangga, uⱡ nga kᵾnt nga kont uⱡ tin ei kai. Nim nga kᵾmp ki raⱡ pikᵾ muⱡangga, nim rok, ndip kona ila munding ei kit. 9 Nim nga mong tenda ei ndi itangga, nim uⱡ kit in ndam, nim nga mong ei, akᵾk ekit tᵾkᵾn, rok mundᵾk kili! Nim nga mong tenda ei tek molkᵾn, uⱡ nga kᵾnt nga kona tin ei kai. Nim nga mong raⱡ pikᵾ ᵾnggᵾlangga, nim rok ndip kona ila rok munding, ei kit,” nitim.

Kng Sipsip Ti Mba Tiki Purum Ei Nga Ik Ek

10 “Enim ya wamp kel mbᵾ nga ti, tᵾk pei mundi nᵾmᵾndᵾi! Enim kundᵾp namp, ya wamp kel mbᵾ rᵾp etmin anggelo mbᵾ ndi, na nga Wuta Got nga kuimp keta ila molk kandᵾk mormin,” nitim. 11 [Na Muⱡᵾl Muⱡᵾl Wu Kupa ei ndi, wamp tiki polk mormin mbᵾ, etᵾp timp nᵾmp mana ur.]

12 “Enim etᵾk pᵾnmin mel nant? Wu ti kng sipsip 100 tepa muⱡangga, tenda ti mba tiki poⱡum ndam, kng sipsip 99 kᵾⱡ muⱡeing nimba, mondpa kelpa, tenda tiki poⱡum ei mba, kuri nakᵾrmba ye?

13 “Enim ik kupa ei, kundᵾp nᵾnt, kng sipsip tenda mba, tiki poⱡum kandpa tᵾm ni nga, numan mam ti etmba ei, kng sipsip 99 tiki puⱡi napᵾⱡᵾng kᵾⱡ, numan etmba ei mel mon. 14 Ei mel ku, nim nga muⱡ ila Wu Tipanᵾm ei ndi, ya wamp kel mbᵾ nga ti, puk tiki puⱡi nᵾpᵾⱡeing nimba pᵾtᵾm,” nitim.

Wu Ʉngᵾn Nᵾkᵾn Tin Ei Mel

15 “Nim nga wu ᵾngᵾnᵾl ei ndi, nim kᵾn uⱡ ⱡawa ti em ndam, pukᵾⱡ tila ndenga ni kᵾⱡ molkᵾⱡ, ⱡawa em ei mel nᵾkᵾn mot ndui. Nᵾkᵾn mot ndana ⱡawa em ei mel tᵾm ndam, ang ndi, etᵾp tᵾnt nᵾkᵾn pili. 16 Muna ⱡawa em uⱡ ei, pilpa tᵾpa pei mondum ndam, pukᵾn wu tenda muna, raⱡ ei mel puk molk, nᵾk tᵾk kun itᵾi! Buk Wingti ila nimba kᵾn, ⱡawa em wamp ei, nᵾk tᵾk kun munding uⱡ ei, wamp raⱡ muna, raldika ei mel rᵾk ila molk, mint nᵾk tᵾk kun munding. 17 Muna wu kᵾⱡ nga ik ei, kum tᵾi natᵾm ndam, ⱡawa em ei mek, Got nga rapa tenda wamp mam ei kᵾn oⱡa pᵾi. Muna rᵾp wamp mam ei nga ik ei, kum tᵾi natᵾpa, tᵾpa mondum ndam, wu ei tᵾk mbo wu mel kep, ku muna takis tᵾtmᵾn wu na mbᵾ mel rundᵾi,” nitim.

Jisas Ndi, Uⱡ Kut Ambuⱡpa Gi Ndᵾi Uⱡ Ei Kᵾn Pendpa Kili Uⱡ Raⱡ Nga Nitim

18 “Enim ik kupa ei kundᵾp nᵾnt, enim ya mᵾi kona ila mi rong uⱡ mbᵾ, Got ndi, oⱡa muⱡ ila mi ku romba. Muna ya mᵾi kona ila mi go nduk teng ndam, oⱡa muⱡ ila mi go ku ndumba,” nitim.

19 “Wote, na ik kupa ti, aldpa kundᵾp namp, ya mᵾi kona ila wamp ralt ndi, ik nᵾk tenda mᵾn kᵾⱡ. Na nga muⱡ ila Wuta ei kᵾn, mawa etkᵾⱡ nᵾnggil mel ei ngumba. 20 Ei nambuⱡ emel, wamp raⱡ kep, raldika kep, na nga mbi tᵾk angᵾndᵾk, mᵾk rok mormin rᵾk ting ila nanim moⱡᵾp ku et,” nitim.

Jisas Ndi, Mel Punt Wu Ralt Nga Ik Ek Rurung

21 Wote, Pita ei ndi, oⱡa omba Jisas waldpa nimba mel, “Nuim ei, na nga ᵾngᵾn wu ei ndi, rᵾk rᵾk na kᵾn ⱡawa etpa mint pum ndam, nit mbᵾ pendᵾp kelip pamba mba, namba iti itangga? Nit pendᵾp kilamba mba, 7 em kᵾn kapⱡa etmba ei?” nitim.

22 Jisas ndi, punt ropa nimba mel, “Pendᵾk kilana mba 7 mint mon, pendkᵾn kelkᵾn mint pana mba 70 pendpa 7 pora itangga. 23 Ik ei mel kundᵾp nᵾnt. Ei nambuⱡ emel, Got nga wamp tᵾpa mumuk rui uⱡ ei, Wu Nuim ti ndi, elim nga kongun wu mbᵾ, kᵾng mel punt mundrum mbᵾ, nimba tᵾpa kun mundᵾmba ei mel. 24 Wote, mel punt mundrum wu mbᵾ ndi, punt rok ngeing nimba pitim ni kᵾn, elim nga kongun wu mbᵾ ndi, ku moni punt 10 miliyon ei mel punt mundrum wu ti, elim kᵾn mek orung. 25 Mel punt pᵾtᵾm wu ni, ku punt romba ei pilpa rundᵾⱡnga, wu king ni ndi, ‘Wu ei kep, amp kangambuⱡa na, kng mel na mbᵾ tᵾk wu mat kᵾn rarᵾp rangina, na nga ku mbᵾ mel puⱡ ila timp!’ nitim. 26 I nilinga, kongun wu ni, wu nuim mumuk ei nga kᵾmp puⱡ ila, mura ropa mondpa, ‘Nuim ye! Na kont kulkᵾn ui mat, roⱡ etkᵾn ngana moⱡᵾp nim nga ku punt, na kᵾn petᵾm mbᵾ, andᵾp kandᵾp tᵾp punt rop ngeimp!’ nitim. 27 Wu peng ei ndi, kongun wu ni nga kont kuⱡpa, ku punt nimbᵾ, punt rok ngᵾngi. 28 Wote, kongun wu tenda ni ndi, ku pena omba kᵾndrᵾm mel, elim kᵾn kongun rᵾⱡaip tenda ila wu ti, elim ndi, ku kum raⱡ ngurum wu ni urum. Kandpa kᵾn, wu ni nga nuim kan ni, ambuⱡpa kint ngumba nimba mel, ‘Na nga ku moni ei tᵾkᵾr kᵾn punt rokᵾn ngui!’ nitim.

29 “Wote, kongun rᵾⱡaip tenda wu ni ndi, kᵾmp puⱡ ila, mura ropa mondpa, ‘Nim ndi, na kont kulkᵾn wak rana, nim nga ku punt na kᵾn petᵾm mbᵾ, pikᵾ punt rop ngeimp,’ nitim. 30 Wote ik ni, pili nᵾpilimp nimba, ku kᵾⱡ punt rokᵾn ngᵾn kᵾn mint, wak rop mundimp nimba, tᵾpa kan ngurum.

31 “I itim uⱡ ni, kongun wu mat ndi, kandᵾk munt mindil tᵾk, pok wu nuim ni kundᵾk nᵾtᵾng. 32 Wu Nuim ei ndi, kongun wu ei wi ropa tᵾpa, ‘Nim kongun wu kit! Na kᵾn kont it ik rᵾngᵾn ni pilip, na nga ku punt nin ila nim kᵾn petᵾm mbᵾ, wak runt ni ka! Na ndi, nim kont kuⱡᵾp, mel punt mbᵾ, wak runt ni mel ku, nim nga kongun tenda wu ei nga ku punt kᵾⱡ wak ku roⱡina ka!’ nitim. 34 I nimba, wu nuim ni, popᵾⱡ kuⱡpa, kongun wu ni tᵾpa, kan manga ila wu kᵾⱡ ngumba, etᵾk elik rundangina, na ku kᵾⱡ punt rangga mint wak rᵾi!’ nitim. 35 Ei mel ku, enim wu ᵾngᵾn ti kᵾn, popᵾⱡ em ei, numan wang nduk, wak rui narᵾng ndam, na nga muⱡ ila Wuta ei ndi, i ku etpa, enim nga uⱡ kit mbᵾ wak rui narᵾmba,” nitim.